Пасол Беларусі ў Ізраілі Ю.Ярашэвіч ўручыў копіі даверчых грамат
13.02.2025 г.13 лютага 2025 г. у Міністэрстве замежных спраў Дзяржавы Ізраіль Надзвычайны і Паўнамоцны Пасол Рэспублікі Беларусь Юрый Ярашэвіч уручыў копіі даверчых грамат Шэфу Службы дзяржаўнага пратакола Гілю Хаскелю.
Падчас гутаркі бакі адзначылі ўнікальны характар гістарычна сфарміраваных сувязяў паміж беларускім і яўрэйскім народамі. Падкрэслена, што гэта цеснае перапляценне гістарычных і культурных адносін служыць трывалай асновай для далейшага развіцця двухбаковага супрацоўніцтва.
У знак павагі да агульнай гістарычнай спадчыны Юрый Ярашэвіч перадаў Кіраўніку Пратакола экзэмпляр памятнага паштовага праекта, прысвечанага 150-годдзю з дня нараджэння знакамітага ўраджэнца Беларусі і першага прэзідэнта Ізраіля Хаіма Вейцмана, юбілей якога абедзве краіны адзначылі ў лістападзе 2024 г.
Адбыўся змястоўны абмен думкамі аб сітуацыі ў рэгіёнах абедзвюх краін. Бакі выказалі надзею на як мага хутчэйшае ўрэгуляванне існуючых канфліктаў, дасягненне міру і аднаўленне стабільнасці.
Асаблівая ўвага была нададзена падрыхтоўцы да святкавання
80-годдзя Перамогі ў Вялікай Айчыннай вайне. Адзначана важнасць захавання гістарычнай памяці і перадачы праўды аб падзеях тых гадоў будучым пакаленням.
