Аб урачыстай цырымоніі ў Лесе Праведнікаў пад Іерусалімам
24.10.2025 г.24 кастрычніка 2025 года ў Лесе Праведнікаў (Яар а-Кдошым) пад Іерусалімам, каля помніка ахвярам яўрэйскіх гета ў Беларусі, адбыўся памятны мітынг, прысвечаны 80-годдзю Вялікай Перамогі ў Другой сусветнай вайне, і цырымонія закладкі капсулы з зямлёй з Мінскага гета.
Мерапрыемства было арганізавана Пасольствам Рэспублікі Беларусь у Дзяржаве Ізраіль сумесна з Всеізраільскім Аб’яднаннем выхадцаў з Беларусі і Всеізраільскім Аб’яднаннем уцекачоў і тых, хто перажыў Халакост, пры падтрымцы Еўрэйскага нацыянальнага фонду Керен Кайемет ле-Ісраэль (ККЛ). Удзел высокіх гасцей падкрэсліў значнасць гэтай падзеі для ўмацавання беларуска-ізраільскіх сувязяў і захавання гістарычнай памяці.
У цырымоніі ўзялі ўдзел віцэ-спікер Кнэсета Дзяржавы Ізраіль, генеральны дырэктар Бюро па сувязях «НАТЫЎ» Офіса Прэм’ер-міністра Ізраіля, высокія прадстаўнікі Міністэрства замежных спраў Ізраіля, у тым ліку першы намеснік генеральнага дырэктара, Паслы Расіі і Узбекістана, дыпламаты пасольстваў Казахстана і Сербіі, грамадскія дзеячы, журналісты і прадстаўнікі беларускай дыяспары.
У сваім вітальным слове Пасол Беларусі ў Ізраілі Юрый Ярашэвіч адзначыў, што Беларусь і Ізраіль падзялілі агульны трагічны лёс народаў, якія перажылі жахі Другой сусветнай вайны і Халакосту, але змаглі захаваць веру, гістарычную памяць і чалавечую годнасць.
Кіраўнік дыпламатычнай місіі падкрэсліў, што праз восем дзесяцігоддзяў пасля Вялікай Перамогі Беларусь свята захоўвае памяць пра ўсіх, хто загінуў у беларускіх Хатынях, у гета і канцлагерах, хто змагаўся за свабоду і дапамагаў іншым, рызыкуючы ўласным жыццём. Пасол асобна адзначыў уклад беларусаў – Праведнікаў народаў свету, а таксама тых, хто змагаўся з нацызмам у партызанскіх атрадах і ў шэрагах Чырвонай арміі.
Цырымонія закладкі капсулы з зямлёй з Мінскага гета стала сімвалам еднасці лёсаў беларускага і яўрэйскага народаў. Гэта зямля ўберагла боль і памяць пра сотні тысяч яўрэяў Беларусі, якія загінулі ў гады Катастрофы, і пра тых беларусаў, што, рызыкуючы жыццём, ратавалі сваіх суайчыннікаў.
На памятным мітынгу было адзначана, што Беларусь надае асаблівую ўвагу захаванню памяці пра ахвяраў Халакосту. У 2000 годзе Прэзідэнт Рэспублікі Беларусь Аляксандр Лукашэнка прыняў удзел у адкрыцці помніка ахвярам Халакосту на месцы былога Мінскага гета, вядомага як «Яма». Гэты мемарыял стаў адным з ключавых сімвалаў смутку і памяці пра яўрэяў, знішчаных нацыстамі на беларускай зямлі. У 2015 годзе адкрыты мемарыяльны комплекс «Трасцянец» – найбуйнейшае месца масавага знішчэння людзей на тэрыторыі сучаснай Беларусі, якое стала важным міжнародным цэнтрам памяці пра Халакост і Другую сусветную вайну.
Мерапрыемства завяршылася хвілінай маўчання, чытаннем яўрэйскай памінальнай малітвы «Кадыш» і ўскладаннем вянкоў да помніка ахвярам яўрэйскіх гета ў Беларусі.
